Basque Know How Fundazioak eta NEIKER-Tecnaliak lankidetza-hitzarmena sinatu dute I+G+bako proiektuen garapenerako
Basque Know How Fundazioak eta NEIKER-Tecnaliak gaur sinatu dute zenbait ekimen garatzeko lankidetza-hitzarmena. NEIKER Tecnaliak ezagutza, baliabideak eta langile espezializatuak jarriko ditu egun Basque Know How Fundazioa (BKHF) lantzen ari den giza garapen jasangarriaren euskal ereduaren analisi-lanetarako eta berau martxan jartzeko.
Lorea Uribarri Basque Know How Fundazioko zuzendariak eta Leire Barañano NEIKER-Tecnaliako zuzendari nagusiak gaur sinatutako elkarlanerako hitzarmenaren bitartez, zentro teknologikoak bere gain hartzen du Basque Know How Fundazioa lantzen ari den giza garapen jasangarriaren euskal ereduaren analisi-lanetarako eta berau martxan jartzeko ezagutza, baliabideak eta langile espezializatuak jartzeko konpromisoa.
NEIKER-Tecnaliak, hala, berrikuntza eta transferentzia teknologikoko proiektuetan ekarpenak egin nahi ditu, BKHF fundazioarekin praktika egokiak partekatu nahi ditu eta produkzioari eta landare-osasunari lotutako esparruetan kolaboratu nahi du. Gainera, NEIKERen espezializaziokoak diren eta Euskadiko ardogintzaren sektorean berrikuntza sartzeko interesekoak diren I+G+bako proiektuetan ere parte hartu nahi du. Basque Know How Fundazioak, bere aldetik, NEIKER-Tecnaliako barietateen sustapena babestuko du, bi erakundeek abiatutako proiektuei ikusgarritasuna emango die eta esperimentaziorako hazkuntza-eremuak jarriko ditu zentro teknologikoaren eskura.
Elkarlanerako proiektuak orain lau urte du jatorria, Eneko Atxa izen handiko sukaldaria eta bere lantaldea, Azurmendi Jatetxean hiru Michelin izar dituena, zentro teknologikoarekin harremanetan hasi zirenean hazkuntza-sistemak hobetzeko erreminten bilaketan. Emaitza gisa, tokiko ekoizleen lana irudikatzen zuen ikerketa-espazio bat diseinatu zen, non hazkuntza-teknika berriak sartuz joan ziren. NEIKERek, gainera, bere germoplasma-bankua edo hazi-bankuaren lagun bat ere eman du, ortuaren hautaketa- eta txandatze-lanetan aholkularitzako lanak gauzatu ditu eta zentro teknologikoan garatutako barietateen haziak eman ditu, patata, tomatea edo piperrarenak kasu.
Hitzarmen honen bitartez sendotu egingo da balio-katea, bi erakundeek defendatzen duten garapen jasangarriko ereduan laguntza emanez
Basque Know How Fundazioari buruz
Basque Know How Fundazioa (BKHF) Garapen Jasangarriko Eredu bat nazio mailan eta nazioartean hedatzeko sortu zen, euskal eredua erreferentziatzat hartuta eta berau “ekimen, erabaki eta proiektu multzo” gisa hartuta, “zeinen bitartez euskal gizartea eraldaketako adibide arrakastatsu eta jasangarri gisa aurkeztu ahal izan den”. BKHF fundazioak eredu horren kultura-balioak ikertuko dituzten proiektuetan parte hartzeko bokazioa dauka, eta baita etorkizunean euskal gizartean eragina izan dezaketen gaiak ikertzekoa ere, koordinazioaren, berrikuntzaren, elkarlanaren, sentsibilizazioaren eta sormenaren bitartez. Hitz batez, euskal gizartearen bilakaeran laguntza eman nahi du, eta errealitate berrietara ireki. Fundazioaren kolaboratzaileen artean daude Azurmendi Jatetxea, Bizkaia Talent, Gorka Izagirre Upategia, Eneko Jatetxea, Euskal Herriko Unibertsitatea eta NEIKER-Tecnalia.
NEIKER-Tecnaliari buruz
NEIKER-Tecnalia, Ikerketa eta Garapen Teknologikorako Euskal Institutua, irabazi asmorik gabeko sozietate publikoa da, Eusko Jaurlaritzako Ekonomiaren Garapen eta Azpiegitura Sailera adskribatua. NEIKER-Tecnalia honako I+G+b helburuekin dago konprometitua: nekazaritza-ekoizpeneko sistemen produktibitatea eta lehiakortasuna hobetzea; ustiategietan gestiorako teknologia berriak garatu eta aplikatzea; eta nekazaritzako elikagaien industria eraldatzailearen, haren produktuen eta kontsumitzailearen kalitate- eta segurtasun-betekizunak bermatzea. I+G+b proiektuez gain, NEIKER-Tecnaliak ezagutza transferitzeko eta prestakuntzarako ekintzak ere garatzen ditu, baliabide eta azpiegitura propioekin eta prestakuntza goreneneko langileekin.